Skip to toolbar

Declaración de Principios

La Orde Masónica Mixta Internacional Le Droit Humain-El Derechu Humanu ta n’Asturies dende l’apertura en 2004 del so primer triángulu, orixe de la R.·.L.·. Progreso, n’Uviéu. Como resultáu del so llabor y medría, en 2018 llega’l momentu d’abrir nuevos horizontes cola apertura d’un taller nuevu na ciudá de Xixón.

Los principios qu’animen esta nueva loxa nun son distintos de los qu’animen la propia orde El Derechu Humanu.

Asumiendo’l principiu de llibertá, oponémonos a tou dogma y defendemos l’estáu laicu, los derechos civiles y el llibre pensamientu.

Afitamos, como nun podía ser d’otra forma, la igualdá ente l’home y la muyer, como amuesa’l calter mixtu de la nuestra obediencia dende la so fundación en 1893. Dende esi mesmu principiu d’igualdá, oponémonos a cualesquier triba de discriminación por razones sociales, étniques, filosófiques o relixoses.

Fieles al principiu de fraternidá, comprometémonos a trabayar pa sacar pa tolos seres humanos el más altu desenrrollu material, moral, intelectual y espiritual, condición necesaria p’algamar una sociedá fraternalmente organizada. Como consecuencia lóxica d’esto, afitamos el nuestru internacionalismu.

Trabayamos, polo tanto, al progresu de la humanidá. Y facémoslo trabayando sobre nós mesmos, intentando ser meyores y facer asina meyor la nuestra redolada. Asumimos asina un doble calter, individualista y colectivu, yá qu’anque’l nuestru llabor seya individual y sobre nós mesmos, facémoslu tamién en collaboración colos nuestros hermanos y hermanes p’asina algamar la meyora colectiva.

Fía de la Ilustración, la masonería afita’l so compromisu col estudiu y la educación como ferramientes necesaries pal progresu social. L’accesu a la cultura nun puede ser un privilexu, sinón un derechu y a la vez un deber pa tou ciudadanu consciente. La cultura fáinos más llibres, ya que permítenos afondar na busca de la verdá y del conocimientu.

Dado que’l Camín pa contra estos oxetivos ye xera revesosa, decidimos que’l nome de la nuestra loxa seya El Trabayu, como símbolu del nuestru compromiso colos nuestros ideales.